الباركوووووور

الدعوة اللى وجهت على منال و علاء , نقدم للسادة الباركوريين مجوعة باركورية منتقاة من الشرح و الايضاح و النصائح

عمرك مرة و انت متأخر عن حاجة و مستعجل جربت انك تمد شوية و انت ماشى , و شوية فى شوية مديت أسرع شوية و المد بقى جرى , و لقيت ان الجرى اسرعلك فنسيت ان حواليك ناس و عربيات و بتاع و قعدت تفوت بسرعة وسط العربيات و تنط من على صندوق زبالة سادد سكتك و تعدى سور نط و انت ساند على يد واحدة , لو عملت كده قبل كده يبقى انت عملت الباركوور

الباركور كلمه فرنسية تعنى العبور و الاجتياز بسرعة , و هى فعلا كده انت حتجرى و تعدى أى حاجة قدامك , نط أو شقلبة أو تسند عليها مش مهم , المهم تعديها , و انت و لياقتك بقى
الباركور رياضة شعبية , و شعبية يعنى انها ملهاش قوانين , مفيهاش رابح و خاسر , فيها استمتاع , انطلاق , تناغم , تتناغم مع جسمك و سرعتك , تستمتع بانسيابك خلال الموانع , تنطلق للأمام دون ان يوقفك شىء , فما ستلقاه لن يصدمك و لن تزيحه , و لكن ستعبره كيفما شئت و كما تستطيع

ممكن تبقى باركورى احترافى , و ده معناه انك لازم تتمرن و تهتم بصحتك و لياقتك , و لكن ممكن تبقى باركورى غير محترف , و ده حيتطلب منك كلم حاجة بسيطة كده :ء
الاحماء : انك تسخن يعنى قبل ما تجرى و تنط , علشان تقدر تعمل مجهود بصورة طبيعية و من غير اجهاد
الملابس: ملابس لازم تكون لا تعوق الحركة , ماتنفعش جونلة مثلا أو بنطلون جينز ضيق , أو بنطلون واسع من غير حزام , يعنى خللى نفسك مستريح
الاحتياطات : أكثر الاصابات شيوعا هى الالتواء , لأن الارجل عليها عامل كبير فى الباركور , فلو الجزمة تكون برقبة زى جزم كرة السلة يبقى تمام , أو اربط رباط ضاغط حول الكاحل , ده بيقلل فرص الالتواء , بس ده اختيارى مش لازم يعنى
و انت بتجرى حاول تنط من فوق حاجات بسيطة , زجاجة مرميه , قفص فاضى , ده حيساعد رجليك انها ماتتعودش على الجرى بس , انما كمان تتعود على القفز و عاى الهبوط
لا تقس على نفسك , و لا يكلف الله نفسا الا وسعها , يعنى لو لقيت نفسك مش حتقدر تعدى حاجز ماتعديهوش , حتلاقى واحد جنبك عداه هوا , ولا يهمك , هو صحته مساعداه , ما تحاولش تحت الناس اللى حواليك معيار لنفسك , انت معيار ذاتك
لا تقيد تفكيرك , استخدم جسمك كله
اجرى و انت سعيد , نط و انت حر

و فى النهاية , لو كنت حتجرى يوم 18 نوفمبر اجرى من طريق مافيهوش أمن دولة
و سلملى على عساكر الجراية

و دى مواقع ممكن تفيدك
www.parkour.com
www.parkour.net

و أخيرا , ميثاق الشرف الباركورى :ء
احترم الممتلكات الخاصة و العامة , انت تجرى ولا تقتحم أو تدمر
لا يكلف الله نفسا الا وسعها , و كل برغوت على قد دمه